Vandittu Sutra
VANDITTU SAVVA-SIDDHE,
DHAMMAYARIE A SAVVA-SAHU A
ICCHAMI PADIKKAMIU,
SAVAGA-DHAMMAIARASSA 1
JO ME VAYAIYARO,
NANE TAHA DANSANE CARITTE A
SUHUMO VA BAYARO VA,
TAM NINDE TAM CA GARIHAMI 2
DUVIHE PARIGGAHAMMI,
SAVAJJE BAHUVIHE A ARAMBHE
KARAVANE A KARANE,
PADIKKAME DESIAM SAVVAM 3
JAM BADDHAMINDIEHIM,
CAUHIM KASAEHIM APPASATTHEHIM
RAGENA VA DOSENA VA,
TAM NINDE TAM CA GARIHAMI 4
AGAMANE-NIGGAMANE,
THANE CANKAMANE ANABHOGE
ABHIOGE A NIOGE,
PADIKKAME DESIAM SAVVAM 5
SANKA KANKHA VIGICCHA,
PASANSA TAHA SANTHAVO KULINGISU
SAMMATTASSA-IARE,
PADIKKAME DESIAM SAVVAM 6
CHAKKAYA-SAMARAMBHE,
PAYANE A PAYAVANE A JE DOSA
ATTATTHA YA PARATTHA,
UBHAYATTHA CEVA TAM NINDE 7
PANCANHAMANU-VVAYANAM,
GUNA-VVAYANAM CA TINHAMAIYARE
SIKKHANAM CA CAUNHAM,
PADIKKAME DESIAM SAVVAM 8
PADHAME ANU-VVAYAMMI,
THULAGA-PANAIVAYA-VIRAIO
AYARIA-MAPPASATTHE,
ITTHA PAMAYA-PPASANGENAM 9
VAHA-BANDHA-CHAVI-CCHEE, AIBHARE BHATTA-PANA-VUCCHEE
PADHAMA-VAYASSA-IYARE,
PADIKKAME DESIAM SAVVAM 10
BIE ANU-VVAYAMMI,
PARITHULAGA-ALIYA-VAYANA-VIRAIO
AYARIA-MAPPASATTHE,
ITTHA PAMAYA-PPASANGENAM 11
SAHASA RAHASSA DARE,
MOSUVAESE A KUDALEHE A
BIYA-VAYASSA-IARE,
PADIKKAME DESIAM SAVVAM 12
TAIE ANU-VVAYAMMI,
THULAGA-PARADAVVA-HARANA-VIRAIO
AYARIA-MAPPASATTHE,
ITTHA PAMAYA-PPASANGENAM 13
TENAHADA-PPAOGE,
TAPPADIRUVE VIRUDDHA-GAMANE A
KUDA-TULA KUDA-MANE,
PADIKKAME DESIAM SAVVAM 14
CAUTTHE ANU-VVAYAMMI,
NICCAM PARADARA-GAMANA-VIRAIO
AYARIA-MAPPASATTHE,
ITTHA PAMAYA-PPASANGENAM 15
APARIGGAHIA-ITTARA,
ANANGA-VIVAHA-TIVVA-ANURAGE
CAUTTHA-VAYASSA-IARE,
PADIKKAME DESIAM SAVVAM 16
ITTO ANU-VVAE PANCAMAMMI,
AYARIA-MAPPASATTHAMMI
PARIMANA-PARICCHEE,
ITTHA PAMAYA-PPASANGENAM 17
DHANA-DHANNA-KHITTA-VATTHU, RUPPA-SUVANNE A KUVIA-PARIMANE
DUPAE CAUPPAYAMMI YA,
PADIKKAME DESIAM SAVVAM 18
GAMANASSA U PARIMANE,
DISASU UDDHAM AHE A TIRIAM CA
VUDDHI SAI-ANTARADDHA,
PADHAMAMMI GUNA-VVAE NINDE 19
MAJJAMMI A MANSAMMI A, PUPPHE A PHALE A GANDHA-MALLE A
UVABHOGA-PARIBHOGE,
BIAMMI GUNA-VVAE NINDE 20
SACITTE PADIBADDHE,
APOLI-DUPPOLIAM CA AHARE
TUCCHOSAHI-BHAKKHANAYA, PADIKKAME DESIAM SAVVAM 21
INGALI-VANA-SADI-, BHADI-PHODI SUVAJJAE KAMMAM VANIJJAM CEVA
DANTA-LAKKHA-RASA-KESA-VISA-VISAYAM 22
EVAM KHU JANTA-PILLANA KAMMAM, NILLANCHANAM CA DAVA-DANAM
SARA-DAHA-TALAYA-SOSAM,
ASAI-POSAM CA VAJJIJJA 23
SATTHAGGI-MUSALA-JANTAGA-TANA-KATTHE MANTA-MULA-BHESAJJE
DINNE DAVAVIE VA, PADIKKAME DESIAM SAVVAM 24
NHANU-VVATTANA-VANNAGA-VILEVANE
SADDA-RUVA-RASA-GANDHE
VATTHASANA-ABHARANE,
PADIKKAME DESIAM SAVVAM 25
KANDAPPE KUKKUIE,
MOHARI-AHIGARANA-BHOGA-AIRITTE
DANDAMMI ANATTHAE,
TAIAMMI-GUNA-VVAE NINDE 26
TIVIHE DUPPANIHANE,
ANA-VATTHANE TAHA SAI-VIHUNE
SAMAIYA-VITAHA-KAE,
PADHAME SIKKHA-VAE NINDE 27
ANAVANE PESAVANE,
SADDE RUVE A PUGGALA-KKHEVE
DESAVAGASIAMMI,
BIE SIKKHA-VAE NINDE 28
SANTHARUCCARA-VIHI-PAMAYA TAHA CEVA BHOYANA-BHOE
POSAHA-VIHI-VIVARIE,
TAIE SIKKHA-VAE NINDE 29
SACITTE NIKKHIVANE,
PIHINE VAVAESA-MACCHARE CEVA
KALAIKKAMA-DANE,
CAUTTHE SIKKHA-VAE NINDE 30
SUHIESU A DUHIESU A,
JA ME ASSANJAESU ANUKAMPA
RAGENA VA DOSENA VA,
TAM NINDE TAM CA GARIHAMI 31
SAHUSU SAMVIBHAGO,
NA KAO TAVA-CARANA-KARANA-JUTTESU
SANTE PHASUA-DANE,
TAM NINDE TAM CA GARIHAMI 32
IHA-LOE PARA-LOE,
JIVIA-MARANE A ASANSA-PAOGE
PANCA-VIHO AIARO,
MA MAJJHA HUJJA MARANANTE 33
KAENA KAIASSA, PADIKKAME VAIASSA VAYAE
MANASA MANASIASSA,
SAVVASSA VAYAIARASSA 34
VANDANA-VAYA-SIKKHA-GARAVESU,
SANNA-KASAYA-DANDESU
GUTTISU A SAMIISU A,
JO AIARO A TAM NINDE 35
SAMMADDITTHI JIVO, JAI VI HU PAVAM SAMAYARAI KINCI
APPO SI HOI BANDHO, JENA NA NIDDHAMDHASAM KUNAI 36
TAM PI HU SAPADIKKAMANAM,
SAPPARIAVAM SAUTTARA-GUNAM CA
KHIPPAM UVASAMEI,
VAHI VVA SUSIKKHIO VIJJO 37
JAHA VISAM KUTTHA-GAYAM,
MANTA-MULA-VISARAYA
VIJJA HANANTI MANTEHIM,
TO TAM HAVAI NIVVISAM 38
EVAM ATTHA-VIHAM KAMMAM,
RAGA-DOSA-SAMAJJIAM
ALOANTO A NINDANTO,
KHIPPAM HANAI SUSAVAO 39
KAYA-PAVO VI MANUSSO,
ALOIA NINDIA GURU-SAGASE
HOI AIREGA-LAHUO,
OHARIA-BHARUVVA BHARAVAHO 40
AVASSAENA EENA, SAVAO JAIVI BAHURAO HOI
DUKKHANAMANTA-KIRIAM,
KAHI ACIRENA KALENA 41
ALOANA BAHUVIHA, NA YA SAMBHARIA PADIKKAMANA-KALE
MULA-GUNA-UTTARA-GUNE,
TAM NINDE TAM CA GARIHAMI 42
TASSA DHAMMASSA KEVALI-PANNATTASSA, ABBHUTTHIO MI ARAHANAE,
VIRAO MI VIRAHANAE
TIVIHENA PADIKKANTO,
VANDAMI JINE CAUVVISAM 43
JAVANTI CEIAIM,
UDDHE A AHE A TIRIA-LOE A
SAVVAIM TAIM VANDE,
IHA SANTO TATTHA SANTAIM 44
JAVANTA KE VI SAHU,
BHARAHERAVAYA-MAHAVIDEHE A
SAVVESIM TESIM PANAO,
TIVIHENA TIDANDA-VIRAYANAM 45
CIRA-SANCIYA-PAVA-PANASANII,
BHAVA-SAYA-SAHASSA-MAHANIE
CAUVISA-JINA-VINIGGAYA-KAHAI,
VOLANTU ME DIAHA 46
MAMA MANGALA-MARIHANTA,
SIDDHA SAHU SUAM CA DHAMMO A
SAMMA-DDITTHI DEVA,
DINTU SAMAHIM CA BOHIM CA 47
PADISIDDHANAM KARANE, KICCANA-MAKARANE PADIKKAMANAM
ASADDAHANE A TAHA,
VIVARIA-PARUVANAE A 48
KHAMEMI SAVVA-JIVE,
SAVVE JIVA KHAMANTU ME
MITTI ME SAVVA-BHUESU,
VERAM MAJJHA NA KENAI 49
EVAMAHAM ALOIA, NINDIA-GARAHIA-DUGANCHIAM SAMMAM
TIVIHENA PADIKKANTO,
VANDAMI JINE CAUVVISAM 50
वंदित्तु सूत्र
वंदित्तु सव्व-सिद्धे, धम्मायरिए अ सव्व-साहू अ
इच्छामि पडिक्कमिउं, सावग-धम्माइआरस्स 1
जो मे वयाइयारो, नाणे तह दंसणे चरित्ते अ
सुहुमो व बायरो वा, तं निंदे तं च गरिहामि 2
दुविहे परिग्गहम्मि, सावज्जे बहुविहे अ आरंभे
कारावणे अ करणे, पडिक्कमे देसिअं सव्वं 3
जं बद्धमिंदिएहिं, चउहिं कसाएहिं अप्पसत्थेहिं
रागेण व दोसेण व, तं निंदे तं च गरिहामि 4
आगमणे-निग्गमणे, ठाणे चंकमणे अणाभोगे
अभिओगे अ निओगे, पडिक्कमे देसिअं सव्वं 5
संका कंख विगिच्छा, पसंस तह संथवो कुलिंगीसु
सम्मत्तस्स-इआरे, पडिक्कमे देसिअं सव्वं 6
छक्काय-समारंभे, पयणे अ पयावणे अ जे दोसा
अत्तट्ठा य परट्ठा, उभयट्ठा चेव तं निंदे 7
पंचण्हमणु-व्वयाणं, गुण-व्वयाणं च तिण्हमइयारे
सिक्खाणं च चउण्हं, पडिक्कमे देसिअं सव्वं 8
पढमे अणु-व्वयम्मि, थूलग-पाणाइवाय-विरईओ
आयरिअ-मप्पसत्थे, इत्थ पमाय-प्पसंगेणं 9
वह-बंध-छवि-च्छेए, अइभारे भत्त-पाण-वुच्छेए
पढम-वयस्स-इयारे, पडिक्कमे देसिअं सव्वं 10
बीए अणु-व्वयम्मि, परिथूलग-अलिय-वयण-विरइओ
आयरिअ-मप्पसत्थे, इत्थ पमाय-प्पसंगेणं 11
सहसा रहस्स दारे, मोसुवएसे अ कूडलेहे अ
बीय-वयस्स-इआरे, पडिक्कमे देसिअं सव्वं 12
तइए अणु-व्वयम्मि, थूलग-परदव्व-हरण-विरईओ
आयरिअ-मप्पसत्थे, इत्थ पमाय-प्पसंगेणं 13
तेनाहड-प्पओगे, तप्पडिरूवे विरुद्ध-गमणे अ
कूड-तुल कूड-माणे, पडिक्कमे देसिअं सव्वं 14
चउत्थे अणु-व्वयंमि, निच्चं परदार-गमण-विरईओ
आयरिअ-मप्पसत्थे, इत्थ पमाय-प्पसंगेणं 15
अपरिग्गहिआ-इत्तर, अणंग-विवाह-तिव्व-अणुरागे
चउत्थ-वयस्स-इआरे, पडिक्कमे देसिअं सव्वं 16
इत्तो अणु-व्वए पंचमंमि, आयरिअ-मप्पसत्थम्मि
परिमाण-परिच्छेए, इत्थ पमाय-प्पसंगेणं 17
धण-धन्न-खित्त-वत्थू, रुप्प-सुवन्ने अ कुविअ-परिमाणे
दुपए चउप्पयंमि य, पडिक्कमे देसिअं सव्वं 18
गमणस्स उ परिमाणे, दिसासु उड्ढं अहे अ तिरिअं च
वुड्ढी सइ-अंतरद्धा, पढमम्मि गुण-व्वए निंदे 19
मज्जम्मि अ मंसम्मि अ, पुप्फे अ फले अ गंध-मल्ले अ
उवभोग-परिभोगे, बीअम्मि गुण-व्वए निंदे 20
सचित्ते पडिबद्धे, अपोलि-दुप्पोलिअं च आहारे
तुच्छोसहि-भक्खणया, पडिक्कमे देसिअं सव्वं 21
इंगाली-वण-साडी-, भाडी-फोडी सुवज्जए कम्मं
वाणिज्जं चेव दंत-लक्ख-रस-केस-विस-विसयं 22
एवं खु जंत-पिल्लण कम्मं, निल्लंछणं च दव-दाणं
सर-दह-तलाय-सोसं, असई-पोसं च वज्जिज्जा 23
सत्थग्गि-मुसल-जंतग-तण-कट्ठे मंत-मूल-भेसज्जे
दिन्ने दवाविए वा, पडिक्कमे देसिअं सव्वं 24
न्हाणु-व्वट्टण-वन्नग-विलेवणे सद्द-रूव-रस-गंधे
वत्थासण-आभरणे, पडिक्कमे देसिअं सव्वं 25
कंदप्पे कुक्कुइए, मोहरि-अहिगरण-भोग-अइरित्ते
दंडम्मि अणट्ठाए, तइअम्मि-गुण-व्वए निंदे 26
तिविहे दुप्पणिहाणे, अण-वट्ठाणे तहा सइ-विहूणे
सामाइय-वितह-कए, पढमे सिक्खा-वए निंदे 27
आणवणे पेसवणे, सद्दे रूवे अ पुग्गल-क्खेवे
देसावगासिअम्मि, बीए सिक्खा-वए निंदे 28
संथारुच्चार-विहि-पमाय तह चेव भोयणा-भोए
पोसह-विहि-विवरीए, तइए सिक्खा-वए निंदे 29
सचित्ते निक्खिवणे, पिहिणे ववएस-मच्छरे चेव
कालाइक्कम-दाणे, चउत्थे सिक्खा-वए निंदे 30
सुहिएसु अ दुहिएसु अ, जा मे अस्संजएसु अणुकंपा
रागेण व दोसेण व, तं निंदे तं च गरिहामि 31
साहूसु संविभागो, न कओ तव-चरण-करण-जुत्तेसु
संते फासुअ-दाणे, तं निंदे तं च गरिहामि 32
इह-लोए पर-लोए, जीविअ-मरणे अ आसंस-पओगे
पंच-विहो अइआरो, मा मज्झ हुज्ज मरणंते 33
काएण काइअस्स, पडिक्कमे वाइअस्स वायाए
मणसा माणसिअस्स, सव्वस्स वयाइआरस्स 34
वंदण-वय-सिक्खा-गारवेसु, सन्ना-कसाय-दंडेसु
गुत्तीसु अ समिईसु अ, जो अइआरो अ तं निंदे 35
सम्मद्दिट्ठी जीवो, जइ वि हु पावं समायरइ किंचि
अप्पो सि होइ बंधो, जेण न निद्धंधसं कुणइ 36
तं पि हु सपडिक्कमणं, सप्परिआवं सउत्तर-गुणं च
खिप्पं उवसामेइ, वाहि व्व सुसिक्खिओ विज्जो 37
जहा विसं कुट्ठ-गयं, मंत-मूल-विसारया
विज्जा हणंति मंतेहिं, तो तं हवइ निव्विसं 38
एवं अट्ठ-विहं कम्मं, राग-दोस-समज्जिअं
आलोअंतो अ निंदंतो, खिप्पं हणइ सुसावओ 39
कय-पावो वि मणुस्सो, आलोइअ निंदिअ गुरु-सगासे
होइ अइरेग-लहुओ, ओहरिअ-भरुव्व भारवहो 40
आवस्सएण एएण, सावओ जइवि बहुरओ होइ
दुक्खाणमंत-किरिअं, काही अचिरेण कालेण 41
आलोअणा बहुविहा,
न य संभरिआ पडिक्कमण-काले
मूल-गुण-उत्तर-गुणे, तं निंदे तं च गरिहामि 42
तस्स धम्मस्स केवलि-पन्नत्तस्स,
अब्भुट्ठिओ मि आराहणाए,
विरओ मि विराहणाए तिविहेण पडिक्कंतो,
वंदामि जिणे चउव्वीसं 43
जावंति चेइआइं, उड्ढे अ अहे अ तिरिअ-लोए अ
सव्वाइं ताइं वंदे, इह संतो तत्थ संताइं 44
जावंत के वि साहू, भरहेरवय-महाविदेहे अ
सव्वेसिं तेसिं पणओ, तिविहेण तिदंड-विरयाणं 45
चिर-संचिय-पाव-पणासणीइ,
भव-सय-सहस्स-महणीए
चउवीस-जिण-विणिग्गय-कहाइ,
वोलंतु मे दिअहा 46
मम मंगल-मरिहंता, सिद्धा साहू सुअं च धम्मो अ
सम्म-द्दिट्ठी देवा, दिंतु समाहिं च बोहिं च 47
पडिसिद्धाणं करणे, किच्चाण-मकरणे पडिक्कमणं
असद्दहणे अ तहा, विवरीअ-परूवणाए अ 48
खामेमि सव्व-जीवे, सव्वे जीवा खमंतु मे
मित्ती मे सव्व-भूएसु, वेरं मज्झ न केणइ 49
एवमहं आलोइअ, निंदिअ-गरहिअ-दुगंछिअं सम्मं
तिविहेण पडिक्कंतो, वंदामि जिणे चउव्वीसं 50
